كتب أحمد عدوان على حسابه الشخصي على موقع فيسبوك:

عشان ما نكذبش ع بعض ؛ أنا كنت خايف كثير في الحرب

خايف من القصف والموت والدمار والأشلاء و اللي كنت بعيشه كل ثانية في دوام الإسعاف

لليوم ومن هان لعند ما أموت ما بتنمسح من ذاكرتي هالأشياء الصعبة اللي مريت فيها ومتمترسة بعقلي وقلبي

وخوفي ع عيلتي وأهلي وأصحابي وجيراني

خوفي من الفقد ؛ إني أفقد حد عزيز أو أشوف حد بيفقد حدا قدامي

أنا ضعيف قدام الفقد ؛ كثير كنت أعيط وأنهار في الدوام بس أشوف حدا جاي يعيط ويبكي ويصرخ ع حد مستشهد إلو

أو حدا مصاب ويطلعو أهله معنا بالإسعاف ويعيطو بحرقة و يقعدو يترجو فينا كمسعفين نعمل إشي أو نحاول

وكنا قدر المستطاع بتوفيق الله نعمل ما كان بوسعنا

بس اليوم خوفي أكبر بكثير من الفوضى اللي صايرة بالبلد

والوضع اللي وصلنا إلو

يا رب عجل بالفرج من عندك